Հայաստանի վարչապետի մամուլի խոսնակ Նազելի Բաղդասարյանը հերքել է մամուլում շրջանառվող լուրերը, թե մայիսի 9-ին Մոսկվայում եռակողմ հանդիպում է նախատեսված Հայաստանի վարչապետ Նիկոլ Փաշինյանի, Ռուսաստանի նախագահ Վլադիմիր Պուտինի և Ադրբեջանի նախագահ Իլհամ Ալիևի մասնակցությամբ։
Ավելի վաղ «Ժողովուրդ» օրաթերթը հայտնել էր, որ մայիսի 9-ին Մոսկվայի Կարմիր հրապարակում կայանալիք ամենամյա շքերթից առաջ ՌԴ նախագահ Վլադիմիր Պուտինը կհանդիպի Հայաստանի վարչապետ Նիկոլ Փաշինյանի եւ Ադրբեջանի նախագահ Իլհամ Ալիեւի հետ: Ըստ ռուսական շրջանակներից օրաթերթին փոխանցված տեղեկության՝ պայմանավորվածություն ձեռք կբերեն, որ մայիսյան տոներից հետո Ալմա-Աթայում ՀՀ-ն ու Ադրբեջանը ինչ-որ փաստաթուղթ ստորագրեն խաղաղության վերաբերյալ:
Հոդվածում նշված էր, որ Ղազախստանը՝ Ալմա-Աթան՝ որպես ստորագրության վայր, պատահական չի ընտրված, քանի որ Փաշինյանի ձեռամբ Ալմա-Աթայի հռչակագիրն է դրված հայ-ադրբեջանական բանակցությունների առանցքում:
«Ժողովուրդ» օրաթերթի հոդվածը կարդալուց հետո հույս էր առաջացել, թե Հայաստանը վերադառնում է նոյեմբերի 9-ի եռակողմ հարթակ, և կա իրական հնարավորություն՝ կանխելու վերահաս էսկալացիան։ Սակայն, ավաղ, հանդիպման մասին տեղեկատվությունը շատ արագ հերքվեց։
Իսկ Ալիևի վերջին հայտարարությունների բովանդակությունից ու մեր իշխանությունների հանդարտությունից պարզ է դառնում, որ պետք է պատրաստվել նոր ցնցումների։
